Luke 20

Iesu di vava mina ni kaiteyadi

(Mt 21.23–27; Mk 11.27–33)

1Meda yokoiri, Sei ni vakena yava ideri, amiye oteimagamo ma sina buni ni rausi regamo ri, bi Sei ma amiye utari naivo vene di warika vene, ago gira oteimana vene, ma amiye di ini tora vene sa ina rofu bosi 2ni kaitesi niyadi, “Una ni, beika vava dudu mina moimai reisa? Ma kaere yaku mina vava ya maro ma reisa?”

3Ni kabai resi niyo, “Na bi nai ni kaitena bi yokoimaka. Na nifa, 4John di babatiso rena di vava bi oma gutuna ba amiye rofu deyo?”

5Iniyeiniye ni dodi resi niyadi, “Beika nigifa, ‘Oma gutuna,’ ina yaku ni kaitesi nigo, ‘Ma beika resi ya bi uka vari gira de maradi?’ 6Idu una yaku nigifa, ‘Amiye rofu,’ vo nigifa ri, bi mina amiye tau yaku fore dudu una umuyegedi, adina ini ukari mokededi bi John bi Sei di ini ago nido amiye yokoi.” 7Dada ni kabai resi niyadi, “Una una toto mina babatiso regamo bi goinari gutu moisi regamo.”

8Ma Iesu yaku niyo, “Na yaku ka makai de ya nigida na bi beika vava dudu mina vegu reida bi.”

Waini meko di muro nari vene di mokena ago

(Mt 21.33–46; Mk 12.1–12)

9Kamini ina vene rofu mina mokena ago nigamo: “Amiye yokoi waini meko di muro variyo ma amiye be yaku fore masi ini muro nari reyadi ma iniye bi ari toragade yava ika oto diyo. ^a 10Resi butu rina di meda okiyo ri ina bi ini naivonaivo amiye yokoi ni feideyo ma muro nari rededi vene rofu waini meko vareyo mina be butu riyainedi. Idu ina bi mina vene yaku mina naivonaivo amiye ubobo resi vana notoka ni feideyadi. 11Kamini dubusa ini naivonaivo amiye yokoi ni feidei boyo ina vene rofu, idu mina vene yaku ka ini ada usi ni moi maena resi vana notoka ni feideyadi. 12Dubusa naivo amiye yokoi ni feideyo, mina bi uru regode niyo mini. Mina ka ubobo resi etofaro makuyadi. 13Kamini waini muro di biyaguna amiye yaku niyo, ‘Beika bi regida? Nai mida ni feidegida, kaere bi nai uka mida; ina vegedi ri, bi rama matagini regedi!’ 14Idu muro nari rededi vene yaku vesi iniyeiniye niyadi, ‘Mina bi muro biyaguna di ini mida. Baifo kumo umuyenadi, ma mina gugura bi una ya auna regifa!’ 15Ye waini muro etofarori makusi umuyeyadi.

“Waini muro biyaguna amiye bi muro nari rededi vene rofu gokai beika be rego? 16Ina bi baisi muro nari rededi vene umuyesi muro bi bouna vene mago.”

Amiye yaku mina sina neideyadi ri, bi niyadi, “Makai bi ga ogau niyaine!”

17Idu Iesu yaku ina vene rofu nei rei vesi niyo, “Sei di agori yaku yomakai nigi niyo? ^b

‘Yava akuna vene ya fore vei etofa reyadi
ye mina fore bi yava moi gira redo fore iniye niyo.’
18Kaere yaku mina fore fafau keto rego bi rei vau uratokugo ma mina fore yaku kaere fafau yarego bi foyoma resi budoka nigo.”

Fore butu resi mana di ni kaitena ago

(Mt 22.15–22; Mk 12.13–17)

19Ago gira oteimana vene ma Sei ma amiye di utari moimai vene di warika vene ida maina regamadi minari moigedi vo nisi, adina bi diba niyadi mina mokena ago ina vene rofu niyo. Idu amiye rofu ori reyadi. 20Iesu vei mona resi ini ura bi Rome vene di gavana di ourefeidena ma vava gabireri aigedi. Dada amiye be fore masi ni feideyadi, kaere bi sina bunibuni kana dudu niyagane. Idu rama iniye bi, Iesu ini ago nigo ri ni eru regedi. 21Ina bi baisi Iesu rofu niyadi, “Oteimana amiye, una una diba ya bi sina rama maka nisa amiye. Ya bi amiye gokai kana bi de moisa, idu Sei di ida oteimaisa sina rama dudu maka. 22Una ni, Caesar rofu takesi fore fei rena bi uni ago gira rofu rorobo ba ide?”

23Idu Iesu bi sena ini ofarosi sina vei mama resi niyo, 24“Siriva fore yokoi na oteimafa. Mina bi kaere di ne uruma ma kaere di roka?”

Ina vene yaku ni kabai resi niyadi, “Caesar di.”

25Kamini Iesu yaku niyo, “Beika Caesar di, bi Caesar mafa, ma beika Sei di, bi Sei mafa.”

26Beika niyo rofu amiye di nemokori moina anua reyadi; ini ago dairi maro rofu tururu reyadi, dada bere niyadi.

Muyenari dadi rae rena di ini ni kaitena ago

(Mt 22.23–33; Mk 12.18–27)

27Kamini Sadducee vene be Iesu rofu baiyadi, kaere bi muyenari dadi rae rena bi egere de vo nidedi vene. ^c 28Ina yaku niyadi, “Oteimana amiye, Moses yaku una rofu bura reyo bi: ‘Amiye kaere ini rema feresi muyego, mida de ma natu bi ini dubuini yaku mina obu mego ma ina rofu ini dubuini di mida mago.’ ^d 29Yokaru bi dubuiyaka viro vara amegamadi. Ourena mida, rema meyo idu muyeyo, mida yokoi de. 30Ina usi vata niyo amiye ka makai 31ma mina usi amiye ka makai. Mina vegu yokoimaka ina viro vara tau noibanu rofu vata niyo — ina tau noibanu mida de muyeyadi. 32Gabi bi mina rema ka muyeyo. 33Ye muyena dadi rae rena ri, ina bi kaere di ini rema nigo, adina bi amiye viro vara tau noibanu yaku meyadi?”

34Iesu yaku ni kabai resi niyo, “Gua ariri amededi rema ma rumana bi mededi. 35Idu kaere rema ma rumana Sei yaku niyo bi buni mina meda baigo ri muyena dadi rae resi ameyaine bi mena de regedi. 36Ina vene bi naivonaivo amiye kana nigedi, de muyegedi. Ina vene bi Sei di mida nidedi, adina bi muyenari gutu dadiyadi. 37Mirona yabo orina agori bi Moses yaku ka una oteimaro, amiye bi muyenari gutu dadigedi, adina bi Warika Amiye rofu nigika bi ‘Abraham di Sei, Isaac di Sei ma Jacob di Sei’ vo niyo. ^e 38Ina bi vegu ameibobina di ini Sei, diya muyena di Sei. Ini mokenari ina tau noibanu bi vegu amededi.”

39Ago gira oteimana vene be yaku ni kabai resi niyadi, “Oteimana amiye, ni kabai rei mona reyo!” 40Adina dubusa ni kaitena bi ori reyadi.

Keriso di ini ni kaitena ago

(Mt 22.41–46; Mk 12.35–37)

41Kamini Iesu yaku ni kaitesi niyo, “Gokai dada ya yaku nidedi Keriso bi David di tutubena? 42Ye David iniye yaku Psalms bukari bura riyo, ^f

‘Warika Amiye yaku nai Warika Amiye rofu niyo:
Nai vana rama ameinu re
43kumo na yaku yi tuma vene yi yuka gabireri aigida.’
44David iniye ka ina rofu roka nisi niyo, ‘Warika Amiye.’ Ye gokai ida dudu ina bi ini tutubena?”

Iesu yaku ago gira oteimana vene di vegu ni diba reyo

(Mt 23.1–36; Mk 12.38–40)

45Amiye tau yaku neidegamadi ri, ini usi dina vene rofu niyo, 46“Vei mona refo ago gira oteimana vene rofu. Ina vene yaku ini ura rededi bi, nana rededi ri varuka doba akusi voivoi sanari amiye yaku buni dudu maka faiva reyagane. Ma usausa yavari amena sana ka buni torari amena ura rededi ma irakuna sanari ka makai. 47Ina vene yaku obu vene di gugura ka duma resi ofa dudu usausa doba nidedi. Mina kana vene, ini kaunava moigedi bi toe tora iniye!”